أكدت الدكتورة إيمان رمضان، وكيل مديرية الشباب والرياضة لشؤون الشباب بالجيزة، أن التحرش له أشكال عديدة، ولابد من وضع قواعد واضحة للتعامل في مختلف جوانب الحياة اليومية، سواء في العمل أو في الحياة الشخصية.

قالت وكيل مديرية الشباب والرياضة، خلال حوار مع الإعلامية مروة شتلة، ببرنامج البيت، المذاع على قناة الناس، اليوم الثلاثاء: قضية التحرش ممكن تكون باللفظ، ممكن كلمة، ممكن لفظ خارج، ممكن تلميح، ممكن سؤال محرج لحضرتك يخص جزء، مش حابه إنه يكون معلن، ده نوع من أنواع التحرش، ممكن يكون كمان بطريقة ما، سواء إرسال شيء غير مقبول على التليفون، يعني كثيرًا بنبعث لبعض رسائل ممكن تكون تبدو طبيعية وعادية جدًا، لكن لما تبص لها من منظور التحرش، ستكون غير طبيعية».

قواعد مواجهة التحرش

وأضافت وكيل مديرية الشباب والرياضة:  «لازم تحطي القواعد اللي انت بتسمحي بيها ليكي ولبيتك ولأولادك، مثلاً، لحد إمتي بتستقبل مكالمات تليفون، ده برضه مش مسموح، فكل القواعد دي اللي بتحطيها، واللي ممكن تظهر بسيطة، هي مهمة جدًا عشان الآخر ما لا يدخل دايرتك غصب عنك أو يكون شايف إن ده طبيعي، كمان مشكلة إن بيئة العمل تكون متسامحة مع النقطة دي، ما عندهاش مشكلة، لكن لو في قواعد صارمة بخصوص الموضوع ده، هتلاقي إن بيئة العمل منضبطة ومفيش فيها مشكلة، ومفيش حد بيتجاوز بتبدأ بينا كأفراد».